Webinarrekke med aktuelle tema for reiselivet
Slitasje på fjellet Prest i Aurland kommune. Foto: Haaken Christensen (Spor AS)
Kunnskapssenter for berekraftig reiseliv inviterer til fem webinar om problemstillingar som reiselivet i Noreg står overfor, med relevans for reiselivsaktørar, kommunar, lokalbefolkning, forskarar, politikarar og andre. Airbnb, hytter, villrein, slitasje på natur og cruiseturisme står på programmet våren 2026.
Plan for webinarrekka:
24. mars kl. 12.15-13.00: Korleis kan reiselivskommunar handtere korttidsutleige og utfordringane det skapar?
Korttidsutleige gjennom plattformer som Airbnb aukar kraftig i Norge, også på Vestlandet. Utviklinga gir nye moglegheiter for verdiskaping, men skapar òg utfordringar for lokalmiljø, bustadmarknad og planlegging. Korleis kan kommunane regulere dette innanfor dagens regelverk? Alexandra Meyer frå Vestlandsforsking presenterer funn om utfordringar og handlingsrom, og byggjesaksbehandlar Stefan Karlstrøm deler erfaringar frå praktisk reguleringsarbeid i Aurland kommune.
Seniorforskar Alexandra Meyer og senterleiar Kristin Løseth inviterer til fem aktuelle reiselivswebinar våren 2026. Foto: Idun A. Husabø
9. april kl. 12.15-13.00: Korleis kan hyttebygging styrkje lokal verdiskaping og gi varige ringverknader?
Det blir bygd stadig fleire og større fritidsbustader i Noreg, ofte samla i tettbygde felt og knytte til etablerte reiselivsdestinasjonar. Slik utvikling kan gje auka aktivitet, arbeidsplassar og verdiskaping i lokalsamfunn som treng det sårt. Samstundes viser forsking at store delar av verdiskapinga i nybyggingsfasen går til eksterne aktørar. Korleis kan kommunar og næringsliv leggje til rette for at meir av verdiane blir verande i lokalsamfunnet – også etter at hyttene er bygde? I dette webinaret møter du Idun A. Husabø i samtale med Sverre Landmark, styreleiar i Sogndal Skisenter Eigedom, og seniorforskar Alexandra Meyer frå Vestlandsforsking.
Foto: Anders Mossing (Norsk villreinsenter)
16. april kl.12.15-13.00: Reiseliv i villreinområde
Det naturbaserte reiselivet er i vekst, og friluftslivet opplever auka interesse. Det fører til meir ferdsel i villreinområda, noko som kan føre til meir stress for dyra, flukt, redusert beitebruk og fragmenterte leveområde for den allereie sårbare villreinen. Over tid svekker dette både dyra si helse og bestandane si evne til å overleve.
I dette webinaret ser vi på kva tiltak som kan hindre at ferdsel i fjellet forstyrrar villreinen. Samtalen med Haaken Christensen frå Spor AS er leia av Idun A. Husabø.
21. mai kl.12.15-13.00: Populære turmål: korleis leggje til rette for auka ferdsel?
Auka ferdsel og bruk av natur til både reiseliv og friluftsliv aukar behovet for å finne balansen mellom naturforvalting og besøksstyring. Konsekvensen av auka ferdsel er ofte meir slitasje på stiar og vegetasjon, forstyrring av dyreliv og behov for meir informasjon og tilrettelegging. I tillegg er det mange uerfarne turgåarar på fleire turmål, kombinert med at klimaendringane bidreg til at slitasjen aukar. I dette webinaret ser vi på korleis vi kan drive god besøksforvalting knytt til populære stiar og naturbaserte attraksjonar. Idun A. Husabø leier samtalen med Haaken Christensen i Spor AS.
Juni (dato kjem): Økonomiske ringverknader av cruiseturismen på Vestlandet
Det har vore ei kraftig auke i tal cruisepassasjerar som kjem til bygdene på Vestlandet dei siste åra. Turistane vil ut av skipa for å sjå og oppleve attraksjonane i regionen. Dei ulike utfluktene genererer inntekter, men mange ulike aktørar er involverte frå turisten bestiller reisa til utflukta er gjennomført, og det varierer kor pengane blir liggande att. I eit planlagt prosjekt skal Vestlandsforsking utforske korleis utfluktene blir organisert i ulike hamner på Vestlandet, og sjå nærare på korleis organiseringa påverkar økonomiske ringverknader for lokalsamfunna. Bård Huseby og Eivind Brendehaug deler erfaringar i webinaret.
Leiar i Kunnskapssenter for berekraftig reiseliv, Kristin Løseth (Vestlandsforsking)
Erfaringar frå Sogn
Webinarrekka har komme som eit resultat av arbeidet med Moglegheitsstudie og tolegrenseanalyse for Sognefjorden, finansiert av Sognarådet, med Visit Sognefjord som fagleg rådgjevar i arbeidet.
– Vi har valt ut tema som vi opplever at mange er opptekne av om dagen, og som har høg relevans også utanfor Sogn, fortel Kristin Løseth, leiar for kunnskapssenteret.
